O aafiaga i fesootaiga faatekonolosi i le faai’uga o le vaiaso ua mavae e pei ona sa faaletonu ai nisi o auaunaga tau faletupe, o femalagaa’iga a vaalele, ma upega tafailagi ua faailoa e le pulega o le matagaluega o fesootaiga ma faamatalaga faatekonolosi i Samoa, sa mata’itū lea faaletonu ma faatino feuiuia’iga ina ia alofia ai ni aafiaga ogaoga e tulai mai.
Ua faailoa e le Ofisa Sili o pulega o lea matagaluega a le Malo o le faaletonu na tulai mai e tele ni aafiaga sa fetaia’i ai ma nisi o auaunaga i atunuu i fafo, ma sa feagai ai nisi o auaunaga e pei o tautua faalesoifua maloloina ma faafitauli, faapea auaunaga o faasalalauga, tautua faalotoifale o malo, ma fesootaiga tau tupe.
E lē o faailoaina i le pepa o faamatalaga faalauaitele na tuuina mai, poo ā ni aafiaga i ia ituaiga o tautua i Samoa ina ua tulai mai lea faaletonu, ae sa vave ona fesootai ia i latou o vaaia ia tautua faatekonolosi e tapena vaega uma manaomia e faaleoleo mo le teuina o faamatalaga ina ne’i ogaoga ni aafiaga i le faaletonu sa tulai mai.
E pei ona silafia sa lipotia le tuai o malaga a vaalele ma o nisi malaga na taofia ona o aafiaga mai lea faaletonu tau fesootaiga faatekonolosi.
