I le faasolo ai o le taamilosaga tele o le taaloga o le tenisi le Australian Open i lenei vaiaso, ua maitauina ai le maoa’e o taumafagaiga le ‘autaaalo a Ausetalia i lenei tausaga e pei ona lipotia mai e le ABC Pacific, e to’aiva (9) sui ua saofagā atu mo le isi vaega o le taamilosaga.
E aofia i lea numera se tasi o alo o Samoa e aumau ma ola a’e i Ausetalia le tamaitai o Destanee Aiava.
Ua ta’ua i tala i taaloga a le ABC Pacific, na manumālō Destanee i le taamilosaga lona lua o le Australian Open lea ia faato’ilaloina ai le tamaitai Belgium o Greet Minnen i ‘ai 5-7, 5-7, 7-5, 7-6 (10/5) ma ia saofagā atu ai i le isi vae o lea taamilosaga.
Ae i faatulagaga o vaegatupe mo lenei taaloga, ua faamauina i nisi o lipoti, i le manumalo ai o Destanee Aiava, o le a ia taulimaina pe tusa ma le $200,000 tālā i lona ausia ai o le isi vae o le taamilosaga.
Na ta’ua e le tamaitai taalo, o se faamāmā avega le maua ai o lenei seleni mai lana taaloga; aemaise mo se tagata e lē o aofia i totonu o le to’aselau pito i luga poo le top 100 o lenei taaloga o le tenisi.
O se taimi muamua lea mai le 4 tausaga talu ona auai Destanee Aiava e taumafai mo le vae muamua o le taamilosaga faavaomalo lenei o le Australian Open ua ia saofagā atu ai mo le isi vae, peitai na faailoa e Destanee, o lona talitonuina o lona tagata ma lana taumafai ua maua ai se atoaga ia te ia e faatino ai ma le manuia lana taaloga.
O Destanee Aiava e 24 tausaga ma o loo tulaga 195 nei i le faatulagaga i lalo o le Asosi o Tenisi a Tamaitai, le (Women’s Tennis Association Rankings) i le taimi nei.
Na soifua mai o ia i Ausetalia, ma o lona tuaā tamā o le Samoa mai Niu Sila, ao o lona tinā e mai Amerika Samoa.
