O le tamā ia Toetu Lepua ma lona atalii ia Siaosi Lepua mai afioaga o Saanapu na mata’ina a la taumafaiga i le tauvaga fasi manu poo le National Boning Champs sa faatautaia i Kalaiesetete i Niu Sila i le vaiaso nei. 

O lea tauvaga a le Silver Fern Farms ua fai si leva ona amata mai ma o tausaga taitasi lava e tele ina faatuputupulaia ai le telē ma le amanaiaina o lenei tauvaga i totonu o Niu Sila. O le faamoemoe o le tauvaga ina ia vaai poo ai le tagata e mafai ona fasi se vaega o le manu (povi, mamoe) i se auala vave ma le mamā (speed & experience). 

Mo le tamā ia Toetu sa galue o se fasi manu i Samoa a o le’i malaga mai ai i Niu Sila mulimuli ane malaga mai lona atalii ma galulue ai loa i le kamupani fasi manu i Niu Sila. 

Ta’ua e le sui o le Silver Fern Farms o Toetu ma lona atalii ua iloga i le lelei o le faatinoga o a la galuega ma e finau foi lea ua i’u ai lava ina faamanuiaina ai i le tauvaga. 

Ta’ua e Toetu ma Siaosi i le Seven Sharp o le faamoemoe lava i le Atua ma faasoa le tomai i tagata lautele ae le gata i lea o le finau mo mea lelei e i’u manuia ai. 

O le iuga o le tauvaga na manumalo ai Toetu i le vaega o fasi manu (mamoe), ae tulaga lua Siaosi i le vaega o fasi manu (povi).