Na manuia le uluai taaloga a le Manu Samoa i le vaveao anapo, ina ua tulai mai ‘ai faaiu i le la taaloga ma le ‘au a Chile, e 43 mo le Manu Samoa ae 10 ‘ai o Chile i le malae i Bordeaux.
Manaia le faatinoga o le taaalo a tama e ui e iai foi nai vaega na lape ai le faatinoga a ‘au uma e lua, ma iu ai i le card samasama mo nisi o tama taaalo.
E 5 sikoa na tatao e le Manu Samoa ma latou ausia ai le aofaiga o sikoa e maua ai se ‘ai faasili poo se ponesi.
O sikoa e 5 a le Manu na tatao e le fullback ia Duncan Paia’aua, le scrumhalf o Jonathan Taumateine, le flanker o Fritz Lee, ma le 2 sikoa a le hooker le alii o Sama Malolo.
O le isi taaloga o le a sosoo mai a le Manu e taaalo ai ma Argentina i le Aso Faraile a sau nei, ae o Chile o le a sagai atu e iloilo ma Egelani.
O le taaloga muamua lea a le Manu Samoa i lana Pool D, ae o Chile o lea ua lua ai ana taaloga, ma o le lua ai foi lea o ana faia’ina i taaloga o Pools.
