O le vaega o faamatalaga, fesootaiga tau initaneti ma faasalalauga i le ofisa autu i Malifa o le matagaluega o a’oga a le Malo e galue ai le susuga Sooalo Tauila Epati Tuumatavai, ua 26 tausaga o le soifua, o lē na tusiaina le ata ua manumalo e avea ma faamau faailoga poo le LOGO o le Fono a Malo o le Taupulega o le a usuia i Samoa i a Oketopa o lenei tausaga 2024.
O le vaiaso na tea nei na faailoa aloaia ai pe launch le faamau faailoga e faailoa ai le ata ua manumalo, ae o le vaiaso nei na faailoa ai e le Matagaluega o A’oga le ata o lana tagata faigaluega na tusia le ata ua manumalo.
Faaalia i le pepa o faasalalauga mai le matagaluega e lē o se taimi muamua lea ua manumalo ai Sooalo Tauila i tauvaga o le tusia o faamau faailoga poo Logos.
Sa manumalo foi i le tauvaga a le EPC poo le faalapotopotoga o le malosiaga faaeletise.
Sa faailoa e Tauila i lana faatalatalanoaga ma le sui o le Malo o Samoa, e faapea o lona auai atu i le tauvaga a le EPC na maua ai lona to’a e toe tauva i le tauvaga sa sailia ai se faamau faailoga o le Fono a Malo o le Taupulega.
Na ia ta’ua e lua ni faamau faailoga sa ia tuuina atu i le tauvaga, peitai sa iai ni teuteuga o le faamau faailoga lea ua manumalo ai, sa fautuaina ai o ia mo teuteuga ma o lea sa tatala aloaia i le vaiaso ua mavae atu.
Faailoa foi e Tauila, o le faatinoga o lana galuega sa ‘auga lava i luga o vaega moomia na aumai e le komiti.
O le faamatalaina o le ata o le faamau faailoga ua atagia ai tagata eseese mai le fonotaga o loo soalaupule mataupu o le fono i se laulauafono.
E faapena foi lanu eseese ua filifilia, e atagia ai le lanumoana o le Vasa Pasefika o le a malaga mai ai tagata eseese o le a auai i lenei fonotaga tele.
Na momoli le faamalo a le afioga i le tamaitai Palemia o Samoa Afioga Fiame Naomi Mata’afa i le susuga Sooalo Tauila Epati Tuumatavai mo le tusia o le faamau faailoga lea ua manumalo i le tauvaga sa faia i le tausaga na tea nei.
