O le alii o Nevo Ioane na manuia lana taumafaiga i le vaega o alii 67kg ma manumalo ai mo le pine auro muamua mo Samoa a o faagasolo ai le taamilosaga siisii u’amea mamafa a Malo o le Taupulega.
Saunoa Tuaopepe i le manuia ai o le faamoemoe a se tasi o le ‘au.
“E faafetaia le tapuaiga a o alofaiva ai tamafanau a le atunuu i faagatama, ma o se amataga manaia tele lea e tusa ai foi o le naunautaiga a le ‘au i lenei taamilosaga.
“E lagona lava le fiafia i le taumafai a Nevo i lona manumalo ai i le pine auro e le o faigofie ona o le tilotilo i le malosi o le ausiisii a Initia ae peitai e foi pea le viiga i le Atua ona o le malosi ua manuia ai le amataga o le faamoemoe a au tamafanau.”
E toafitu sui filifilia a le ausiisii u’amea mamafa a Samoa o loo tapena ma e tolu vaega o loo agai iai lenei tauvaga o le vaega laiti (Junior), vaega talavou (Youth) ma le vaega matutua (Senior) ma o le ‘au a Samoa e toalua tamaitai e aofia ai Lesila Fiapule, Iuniarra Sipaia ma le toalima o alii Nevo Ioane, John Tafi, Maeu Nanai Livi, Don Opeloge ma Sagele Mao.
O le afiafi nei i le ‘afa ole itula e 5 o le a sii ai John Tafi i le vaega o le 73kg.
