O le tamaitai ia Miracle Afele sa avea ma sui tauva a le Asosi a le Sign Language Interpreters i le tauvaga tausala a Samoa o le tausaga o se tasi o sui faauu mai le sefulu ma le valu o i latou na faauuina i le Tusipasi II o le Skills for Work and Vocational Pathways.
O Afele o se tamaitai e logonoa ma o se fiafiaga lea i lona tina ma ona aiga sa molimauina le faamanuiaina o lana taumafaiga i aoaoga i le aoga a Ausetalia le Australia Pacific Training Coalition i Vaivase mo le ono masina.
Na faaalia e lona tina ia Levei Leuluai lagona o le faafetai ma le faamalo i lona alo ona e ui ina iai aafiaga tumau o le soifua ae lē o avea lea ma papuipui o lona ola taumafai.
“O Miracle o le ma ulumatua lea ma i le fanau e lagona le fiafia ona ua faaiuina lona taumafai, sa umi se taimi ae o lea ua toe sau e faaauau lana aoga sa leva ona manao ai e toe sau e toe aoga ae ona o lana galuega.
“O lenei la aso ia ua mae’a ai lona taumafai sa iai lava aso e tuua atu ai le aoga ma faasoa atu e iai lava isi mea o le aoga e le o malamalama tele iai ae lē mapu ai le faamalosiau isi a’u tama e pei lava o soo se matua alofa e fautua ma ave le upu faamalosi.
“O le lagolago foi a le matou aiga ma le tatalo faia pea ina ia manuia le olaga o Miracle, o totonu o le matou aiga e malamalama uma la’u fanau i le faatinoina o le sign language e fesootai ai ma Miracle ma o le agaga faafetai e lē o avea aafiaga tumau o lona soifua ma vaega e taofia ai lona lagona e aoga e faalauaitele lona tomai ma agavaa.
“E momoli ai la’u faafetai tele i le aoga lenei i le aoaoina o Miracle i faiaoga sa fesoasoani tele i lona ola taumafai atonu o lenei faailoga o le a faaaogāina e ia e siitia ai i se isi laasaga o lona soifua tautua aemaise lona soifua aoaoina.”
Ua toalua ai alo o Leuluai ua mae’a faauuina atu i le aoga lenei a Ausetalia ma na ia ta’ua, “O le isi o’u atalii sa faauu atu i le polokalame lenei ia lea ua iai ma Miracle o faailoga vaaia ia o le naunau o ia e suesue afai la e mafai e lo’u atalii aisea la e lē mafai ai e ia, o lona lava loto tauivi ma le finau lea ua iu manuia ai ana taumafaiga.
“O le vaega e iloa ai le naunau o Miracle o le mafai ona mae’a le isi faamoemoe toe alo i le isi faamoemoe e pei ona iai le sailiga tausala sa auai ai e le se tagata faalogologotiga.”
O loo galue nei Afele i le aoga a le SENESE ma ua 27 ona tausaga mai le afioaga o Vaitele Uta.
E 103 i latou na faauuina mai i lenei aoga mai 12 polokalame sa aoaoina ai i le 6 masina ma o le aoga lenei ua silia ma le 2,000 Samoa ua faamanuiaina ai i faailoga ma tusipasi i le tele o tausaga ua mavae.
