Ua faaalia le lē fiafia o se alii o loo falepuipui nei i lona aumaia faananā o pauta faasāina i le atunuu, i le umi tele o le taimi o lona faasalaga.
Ua finau lenei alii e itiiti ma māmā atu le aumaia i totonu o pauta faasāina o le cocaine na i loo le aumaia o pauta faasāina o le methamphetamine.
O lē o loo molia o le alii Amerika i Saute o Felipe Montoya-Ospina, ma o ia o se tasi o tagata mai lea itu o Amerika na faia nei soligatulafono a o galue ai i se tasi o fanua e gaosia oloa mai manupapalagi, poo le Dairy i Canterbury.
I tala’aga o gaioiga a Filipe ma isi o loo molia faatasi, e lata i le 4 tausaga o faatino e i latou nei gaioiga faasolitulafono, sa māua lo latou aumai faananā o pauta faasāina nei e oo atu lava i le silia ma le 10 miliona le tau aofa’i.
Ta’ua i lipoti mai leoleo, o se tasi lea o vaega aupito i telē lava le sapalai o le aisa o le cocaine i Niu Sila i le va o le masina o Ianuari o le tausaga 2018 aga’i ia Tesema 2021.
Na falepuipui Felipe i le tausaga na se’i mavae atu nei i lona ioeina o lona auai i faufauga faasolitulafono, o lona aumaia i totonu o le atunuu o le oo atu i le 11.4 kilokalama o cocaine, ma lona taumafai e aumai le isi 28.87 kilokalama o nakoti ma lona faatauina ma le tufatufaina atu o nei pauta faasāina.
E 14 tausaga ma le 7 masina o loo faasala ai Felipe i le to’ese.
Puna o Faamatalaga: https://www.newstalkzb.co.nz/news/crime/canterbury-cocaine-ring-felipe-montoya-ospina-loses-bid-to-have-jail-term-reduced-on-appeal/
