A o amata ai le faiga fou ua faatapulaa ai le maualuga o le tupe faaalu i pasese mo femalagaa’iga lautele a Aukilani, ua iai le manatu e tatau ona faalautele ia Niu Sila atoa.
O le aso ananafi lea na amata aloaia ai le suiga ua faagata ai nei i le $50 i le vaiaso tupe faaalu e le tagata o loo faaaogāina femalagaa’iga lautele i Aukilani, ma e lē gata o feoa’iga i pasi ma trains ae faapea vaa feoa’i i le sami.
Ua fai mai ai le sui o le asosi a le Public Transport Users, Jon Reeves i tala a le 1News o se suiga lelei, ma i lona manatu e tatau ona faia foi e aai e iai Ueligitone ma Kalaiesetete.
Na ta’ua e le pulenuu o Aukilani Wayne Brown, o se suiga tele mo le manuia o Aukilani, ma ua faamaonia mai foi e le Auckland Transport, o le suiga fou ua aloaia nei ua manuia ai le tusa ma le 36,000 tagata o loo faaaogāina femalagaa’iga lautele a Aukilani.
Puna o Faamatalaga: Akl’s public transport fare caps should be used nationwide – advocate (1news.co.nz)
