E manaomia e le Malo o Ausetalia le faatalanoa atili i le tulaga faavaomalo o le Pasefika o le mataupu i le faafaigofie o visa e malaga asiasi atu ai poo visa tafao, ma avanoa e nofomau ai tagata o le Pasefika i totonu o lea atunuu tuaoi.

Ua faailoa lea tulaga e le minisita o mataupu tau i le atina’e, ma mataupu tau i le Pasefika a lea Malo a o iai i Samoa i sana asiasiga e lua aso.

Faaalia e le alii Minisita o Pat Conroy i se feiloaiga ma tusitala o se tasi lea o atugaluga ua faaleo e nisi o taitai o atunuu o le Pasefika, ae o le taimi nei ina ua suia le faigamalo a Ausetalia ua loloto le vaai i se tulaga e avanoa ai ni aiaiga tau visa e faigofie mo tagata Pasefika e fia asiasi i o latou aiga, e pei ona taoto se isi fuafuaga a lea Malo o le 3 afe o avanoa i le tausaga e nofomau ai tagata o le Pasefika e aofia ai ma Samoa.

O le finagalo o le alii Minisita, o Samoa le atunuu o le Pasefika o loo pito toatele ona tagata ma ona tupu’aga o loo aumau ma nonofo i Ausetalia ma o se itu lea e tāua tele i le silasila mamao i fuafuaga a lona Malo.

I le itu i avanoa o galuega faavaitaimi ua faaalia e le Minisita o le siitia i le 35 afe avanoa mo ia galuega mai le 20 afe avanoa sa iai, o se tasi lea o pine faamau o le naunau o le Malo o Ausetalia e ofo mai galuega nei ina ia fesoasoani ai i le tamaoaiga o atunuu, ma faatamaoaiga ai fuafuaga a aiga i lo latou atina’e.

Peitai o se itu e tāua tele e pei ona faaalia e Conroy, le iai o le faitalia i pulegamalo a atunuu o le Pasefika e fuafua lelei ai poo ai tagata e agavaa i ia galuega, ae toafia foi e tatau ona malaga ai.