O le faailogaina e Samoa o le aso Faavaomalo o Tina ma Tamaitai o le Lalolagi o lenei tausaga, ua faamauina ai le malosi o sootaga vava lalata o le Faalapotopotoga Faufautua o Tamaitai Leoleo o le malo o Samoa ma le auaunaga a le Faalapotopotoga tumaoti o le Toomaga mo e Puapuagatia.
E tusa ma le 30 sui o lea faalapotopotoga faufautua a tamaitai malu o le malo na latou asia le nofoaga o loo tausia ma vaaia ai fanau ua sauaina, ma ua faailoa ai e le Pelesetene o le Toomaga ose tasi foi sa avea ma leoleo i tausaga ua tuanai le faletua o Siliniu Lina Chang, o se faailoga lea o le galulue faatasi o tamaitai leoleo ua ofoina o latou soifua e tautua ai lo tatou malo ma le atunuu e lagolago atu ile latou foi galuega.
Sa foai ai e sui o le faalapotopotoga faufautua a tamaitai leoleo nisi o oloa mo le tausiga o fanau sauaina, ae sa maua ai foi le latou mafutaga e faasoa ai ma i latou o galulue i le vaaia o ia fanau.
Faaalia e le Peresitene o le Toomaga o se avanoa tāua lea ua asiasi atu ai tamaitai leoleo o loo umia tofiga sinia ma nisi o loo umia isi tulaga faaleoleo e silasila ma molimauina a latou foi galuega o loo taumafai ai e taofia sauaga faasaga i tamaitai ma fanau iti.
O le sui Komesina le susuga Papalii Monalisa Tiai Keti ma le Sui Komesina lagolago le susuga Papalii Efo Peika Moalele na taitaia le vaega o tamaitai leoleo sa asia le nofoaga o le Campus of Hope i Tuanaimato.
