Talu mai ona uma atu le koviti na poloka ai le tele o taaloga, taofia ai foi ma le toe faia o le iuni a le Aukilani Samoa, na maitauina ai le feoai solo o tupulaga o le atunuu e tau saili ni kalapu e faaauau ai le taleni lakapi ua latou maua, ae ina ua toe lalaga mai le iuni ma toe faaauau ana taamilosaga ua maitauina ai e le ofisa poo le laulau o loo faafoefoeina le iuni lakapi a le Aukilani Samoa le telē o le suiga ma le maualuga ua oo iai tapenaga o ‘au a afioaga ma kalapu o lea ua auai, ae mafuli lava i fanau laiti.
O fanau o loo taaalo i isi kalapu i totonu lava o Aukilani ua latou faamaopopoina ‘au a o latou nuu, ae faapea foi i fanau sa taaalo i le Manu Samoa lea foi ua tuuina mai lo latou tau’au e faasoa ai lo latou malamalama i fanau laiti o loo atia’e ane foi le latou taalo.
O le tausaga nei lea foi ua toe pisapisao ai le malae i Aorere Park i le tapuaiga a nuu ma afioaga o loo auai a latou ‘au.
E 14 ‘au o loo iai e aofia ai Malisi, Nation, Laulii, Saleimoa, Moataa, Nofoalii ma le Pineula mai Salani i le Pool A, ae o le Pool B o loo iai le ‘au mai Vaimoso, Leulumoega Tuai, Apia Maroons, United Brothers, Vailele, Vaiala ma Sataoa.
O le ‘au a Laulii o loo umia le talita i le taimi nei ina ua latou seiina mai i le ‘au malosi a Malisi sa umia le talita i le tausaga ua mavae.
O loo tumau pea le maualuga o le taamilosaga a le Aukilani Samoa i tausaga taitasi e ala lea i le tapueina, faamalosia o le taleni a fanau faatasi ai ma le faanofo fealofaniina o tupulaga o Samoa i totonu o Aukilani.
