O le mafui’e malosi na lūlū i se vaega maualuga i le itu i Sisifo o Saina ma isi vaega o Nepal ua faaleagaina ai le faitau selau o fale faapea magāala ma ua maliliu ai a itiiti mai, pe 126 tagata i Tibet.
E to’atele o loo poloka i fale ua solo a o faaauau pea ona faalogoina lūlūuga poo aftershocks.
O loo molimauina tagata faigaluega lavea’i ua fe’aei i faaputuga o piliki i fale ua solo ma isi ua faaaogā apefa’i ina ia oo ai i nisi vaega o iai tagata ua tanumia.
A itiiti mai pe 188 tagata manunu’a ua faamauina i Tibet lava ia i le itu e lata i le tuaoi.
E silia ma le afe fale ua faaleagaina.
Na faalogoina foi e tagata mai le itu i Matu i Sasae o Nepal le mafui’e lea ma lona malosi ae lē o iai ni lipoti o ni mea o faaleagaina mai lea faaitu.
Ua vaaia videos ma ata o tagata o loo tamomo’e ese mai ma nofoaga ua aafia ma ua faailoa e le matagaluega a le va i fafo a Niu Sila o loo latou mata’itūina le mataupu lenei aemaise ua faamaonia na faalogoina foi lūlūuga i Initia ma Bhutan.
Ua faailoa foi e le’i iai ni talosaga mo ni fesoasoani mai tagata Niu Sila o loo aumau i vaega ua aafia o Tibet ma ua iai faatonuga ua faailoa iai e ao ona faatino pe afai e mana’omia se fesoasoani ma ia lesitala i le upega tafa’ilagi a le Safe Travels.
Puna o Faamatalaga: https://www.1news.co.nz/2025/01/08/death-toll-rises-to-at-least-126-after-earthquake-in-tibet/
