Ua faailoa e le aiga o si tina mai Niu Sila nei lea na maliu i le faalavelave ananafi i se taulaga faatau i Amerika, e leai ni upu e faamatalaina ai le agaga faanoanoa o iai lo latou aiga i le taimi nei.

O si tina o Patricia McKay 68 tausaga na maliu ina ua lavea i se taavale i le mae’a o le gaoiga o se faleoloa i le Fashion Island Mall i Newport Beach i Kalefonia.

I se pepa o faamatalaga mai lona aiga ua lipotia i le One News ua ta’ua ai faanoanoaga o si aiga.

O le toalua o le tina ua maliu sa avea ma taitaifono o le BNZ ma Ofisa Sili o le Pulega a Aukilani.

O loo lipotia o le faalavelave na taumafai ai ni alii se toalua e gaoia ni aitema mai le tina ma iu ina lavea ai i le taavale na ave atu e le isi alii o le augaoi, ua maua uma i latou ia e leoleo ma ua faia moliaga.

Ua faamaonia mai e se sooupu mai le matagaluega o le va i fafo ma fefaataua’iga o loo tuuina atu nei le fesoassoani i le aiga o se tagata Niu Sila na maliu i le faalavelave lea ananafi.

Puna o Faamatalaga: https://www.1news.co.nz/2024/07/04/no-words-can-express-our-sadness-family-of-kiwi-woman-killed-in-us