Ua māua nei i ripoti le maliu ai o se tamaitai, ae o loo iai i se tulaga tigaina se alii ina ua tafana e leoleo i la’au ona o se mataupu faalotoifale na tulai mai i Kalaisitete.
O le po o le Lulu na valaau ane ai leoleo i le tuatusi o le Clyde Rd, Bryndwr poo le itula e 11 ina ua o latou taulimaina ni ripoti o se alii o loo ia umia se aupeaga matautia, o se naifi ma o loo ia faatino ni aga taufaamata’u i lona paaga poo lona toalua faapouliuli, ma le tala e na te faaoo foi manu’a ia te ia lava.
Na taunuu atu leoleo i le nofoaga poo le tuatusi ae vaaia loa le momo’e mai i fafo o le fale o le tamaita’i ma o loo sau ai i tua le alii o loo maitauina lona faalālā ai o le agaese poo le naifi sei tulou.
Talu ai o loo i se tulaga ma’ale’ale le tamaitai ma le ono lepeti o lona saogalemu mai lana paaga, o lea na faatino ai loa e leoleo, lo latou pitolaau, i le fana ai o lea alii ina ia faasaoina le tamaitai.
Ae i le aafia ai o le alii, o lea na maitauina ai loa le tago a’e le tamaitai i le naifi lava lea ma faalālā loa i leoleo ma faia gaioiga taufaamata’u.
O se gaioiga a tonu na faate’ia ai le toatele, ma fesiligia ai lana gaioiga. O lea na talosagaina e leoleo le tamaitai e tuu i lalo le naifi, ae paga e lei usitaia e lenei tamaitai ma I’u ai lava ina fana e leoleo, ua tauau na lepeti ai foi lo latou saogalemu.
E ta’ua i ripoti a le New Zealand Herald, e tigaina le tamaitai na aafia ma sa tamaufai malosi fesoasoani muamua poo sui o faalavelave faafuasei e tali atu ma fesoasoani e togafitia lē ua aafia, peitai ona o le tuga tele o ana manuaga na maliu ai lava o ia.
Ae mo le alii na muai faatinoina le taufaamata’u ma le umiaina o le aupega matautia na avatu i le falemai mo togafitia, ma o loo iai pea i se tulaga tigaina.
Faamauina le faasolo ai o se suesuega e tusa ai ma le mataupu, ma ua tuuina atu foi i le vaega o tutoatasi le Independent Police Conduct Authority (IPCA), e tusa ai ma aiaiga i le tulai ai o se mataupu o loo aofia ai le fana ai e leoleo o se tagata.
Puna o Faamatalaga: https://www.nzherald.co.nz/nz/crime/police-swarm-christchurch-suburb-responding-to-serious-i
