E 71 tausaga o se tamā ua faamaonia mai ua maliu ina ua maua atu i vaega sa lolovaia o Brisbane i le taeao analeila.
Na valaau ane leoleo i le faalavelave lea i Greenbank i le taeao analeila ma lipotia ai o le taavale sa magoto i se fale i Begley Rd i lea lava faaitu ma na maua atu le tamā matua lea ua maliu e lata ane lava i le taavale.
E lē o iai se isi o masalomia i lenei faalavelave ma o loo galulue ai nei leoleo mo se lipoti e tuuina atu i le coroner.
O le taimi nei o loo fautuaina pea nisi vaega o Kuiniselani i uiga loulouā o le tau ma o loo fautuaina foi faaitu e pei o Brisbane, Gold Coast ma le Sunshine Coast i faititili ma uiga loulouā o le tau i le asō.
O isi faaitu o Ausetalia e pei foi o Sini o loo fautuaina i timuga mamafa.
