E lē o se amataga fiafia ua tomua ai taaloga a le aumasii a Samoa mo taaloga o le Olimipeka i Paris i Falani, ina ua sau ai le tala faanoanoa i le maliu faafuasei o si alii faiaoga o le fusuaga, le susuga Lionel Elika Fatupaito, i le taeao o le Aso Faraile, 26 Iulai i le vaipanoa o loo faagasolo ai taaloga (Games Village), e pei ona lipotia e le PMN News se faamatalaga ane a le Samoa Association of Sport and National Olympic Committee (NOC).
O le tatalaina o taaloga a le Olimipeka i le taeao analeila na faailoa mai ai foi e i latou sa faasalalauina mai lea polokalame, lenei tala faanoanoa ina ua faafeiloai aloaia mai le autaaalo a Samoa.
I lipoti a le PMN news o loo ta’ua ai se finagalo faaalia o le susuga i le Peresitene o le Samoa NOC, susuga Talalelei Pauga, e faasino atu i lē ua maliu ma ia ta’ua ai, ‘O Lionel o se tasi o faiaoga maoa’e i aufusu a Samoa, ma sa maualuga lava lona talitonuga e mafai e Samoa ona finauina sana pine i le tauvaga o fusuaga i le Olimipeka.’
Ua ta’ua i lipoti, sa faia se feiloaiga a le susuga i le Peresitene ma le Failautusi o le autaaalo, Maureen Tuimalealiifano, ma le autaaalo atoa a Samoa mo se faailoga puupuu atu iai o lenei tala faanoanoa aemaise o se faamalosiau i le autaaalo ina ia maua pea le lototele a o latou sauni atu ai mo le tatalaga aloaia o taaloga e pei ona iai i le taeao analeila.
O le a iai se isi lipoti auiliili i se taimi o mulimuli mai, ae ua momoli atu ai faamaisega i le aiga faanoanoa o le alii faiaoga mo fusuaga, le tapuaiga a le atunuu atoa aemaise lava i le autaaalo o loo masii atu i Falani mo le finauina o se ‘ai o Samoa i nei taaloga faitaulia a le lalolagi.
