Ua faamaonia foi e le Kapeneta le sainia o ni maliega se lua (2) i le va o le Matagaluega o le Soifua Mālōlōina ma le Kamupani a le Medican Services Limited.
O nei maliega o le a mafai ai ona auina atu gasegase mai Samoa, ua faamaonia i lalo o le polokalame a le Malo mo gasegase e auina i fafo, mo togafitiga i falema’i e lua i Initia ua faaopoopoina nei.
O falema’i o loo aofia i nei maliega o le Artemis Medicare Services Limited ma le Fortis Hospital Limited.
O le polokalame lenei mo gasegase e auina i fafo, ua tele tausaga o faatino ma o loo faaauau pea.
O Niu Sila ma Initia o loo auina iai a tatou gasegase ua faamaonia e lē mafai ona togafiti i Samoa nei.
O le sainia ai o nei maliega, o le a mafai ai ona maua isi auaunaga ma togafitiga faaopoopo, e lē o mafai ona faatinoina e falema’i o loo galulue ma Samoa i le taimi nei.
