O le galuega vaavaalua lea a le Matagaluega o le Siosiomaga ma le ofisa o polokalame o le siosiomaga a le Pasefika poo le Secretariat of the Pacific Regional Environmental Programme (S.P.R.E.P.) i vaega o loo ola ai manu ma laau i vaomatua o le atunuu.
Ua faamae’aina se tasi o ana suesuega e ala i le mata’itu o le ola o vaega nei o le siosiomaga ma le naunautaiga ina ia faaauauina pea le faasaoina.
E pei ona faafoeina ai i Savaii i nisi o nofoaga e aofia ai Tafua, Falealupo ma nofoaga tumatafaga, Faleaseela, Togitogiga ma Uafato.
O le aoina mai o faamaumauga mai nei nofoaga ina ia faalauaitele le malamalama i vaega nei o le siosiomaga o le atunuu e tauala mai i faamaumauga ua tuufaatasia.
Sa faailoa e le Faauluuluga o lenei vaega a le Matagaluega, Czarina Iese Stowers o le galuega sa faatinoina e silafia ai le eseese o vaega o loo ola ai manu ma laau i le siosiomaga.
“O a matou taumafaiga e faalagolago lea i faamaumauga e aoina mai i suesuega e fesoasoani lea ia i matou ina ia matou iloa ona tuusa’o lava nei manu i nofoaga e tatau ona ola ai.
“O le tomai foi lea e aogā i faiga filifiliga i vaega tau faasao ma vaega e ao ona ave iai le faamuamua mo le saogalemu o vaega nei o le siosiomaga.
“O species taitasi e ave iai le vaai taulai a le matou vaega i taimi o suesuega e telē lona aogā i le siosiomaga ma e ao ina puipuia i tulaga o faasao pe a malamalama muamua iai.
“A mae’a ona faia faamaumauga ona faatusatusa lea ma faamaumauga mai tausaga ua mavae faatoa mautinoa ai le ituaiga gaioiga e mafai ai ona faasaoina nei species.”
O nisi o manu sa faapea ona agai ai nei suesuega e aofia ai le Manumea, Ma’oma’o ma le Pepe.
Na faafetaia ai e le Matagaluega le lagolago a le S.P.R.E.P aemaise le faalapotopotoga o Atinae a Malo Aufaatasi i Samoa nei ua mafai ai ona faataunuu lenei suesuega.
