Ua faamavae mai i le Malo ma lo tatou atunuu le tamaitai Komesina Maualuga o le Malo o Ausetalia le susuga Emily Luck ina ua mae’a lona taimi galue sa avea ai ma sui o lona Malo i lo tatou atunuu.

O le Aso Tofi ua mavae na talimalo ai le Komesina Maualuga i sui o le tatou Malo le afioga i le Sui Palemia ma minisita o le Kapeneta, o faauluuluga o matagaluega ma faalapotopotoga a le Malo, le taitai o le itu agai faapea sui o isi Malo i fafo o loo iai o latou ofisa i Samoa, aemaise o uo a le tamaitai Komesina Maualuga ma lona aiga.

Faaalia e Emily Luck e uigaese lona taimi na taunuu ai i le tausaga e 2021 ma tauaao ona tusi tofiga i le afioga i le Ao o le Malo, ona o se taimi muamua i le 40 tausaga ua suia ai le faigamalo a Samoa.

O le moliau a le tamaitai Komesina Maualuga o se taimi tāua tele mo ia, ona sa ia mataitu ai ma molimauina le faagasologa o pulega faatemokalasi a Samoa ma le suia o le faigamalo i le tuanai o le 40 tausaga.

O se taimi maaleale foi na amatalia ai tiute o le Komesina Maualuga ona e taunuu mai o loo iai Samoa i puipuiga o le faamai koviti lea sa tapunia uma ai femalagaa’iga ma faia vavao na aofia uma ai le atunuu.

O le tausaga fou o le a taunuu ai le sui fou o le Malo o Ausetalia o le a tauaveina le tofiga Komesina Maualuga o lea Malo i lo tatou atunuu.

E lei faailoaina mai le sui fou o lea Malo.