Ua mae’a aloa’ia taaloga o le Olimipeka 2024 i Paris ina ua faataunuuina le tapuniga aloa’ia i le po anapo, peitai ua lāgā nisi o finagalo i le asō i le lē iloa atu o Niu Sila i le faafanua o le lalolagi sa faailoa i le taimi o le sauniga e tapunia ai taaloga i le po anapo.
Fai mai le televise tasi e foliga e lē lava le tulaga 11 o iai Niu Sila i le faasologa o Pine e faamautu ai sona tulaga i le faafanua lea e pei ona faaata anapo.
O loo iloa atu ai atunuu o le lalolagi peitai o le vasa e i autafa ane o Ausetalia o loo iai se avanoa tele ae maitauina e le to’atele o isi atunuu e talitutusa le tetelē ma Niu Sila o loo iloa lelei atu lava i le faafanua.
O Dame Lisa Carrington lea na mauaina pine auro e 3 mo Niu Sila faapea Finn Butcher o le ulua’i pine auro a le atunuu i tuuga kayaki a alii, o i laua ia na tauaveina le tagavai a Niu Sila i le sauniga o le tapuniga aloa’ia o le Olimipeka i le po anapo.
Puna o Faamatalaga: https://www.1news.co.nz/2024/08/12/new-zealand-left-off-world-map-in-olympics-closing-ceremony/
