Ua autasi nei afioga i faamasino e toatolu lea na nafa ma le iloiloina o le talosaga apili i le aoauli nei le afioga i le Faamasino Sili Satiu Simativa Perese, le afioga ia Tafaoimalo Leilani Tuala Warren faapea ma le afioga ia Fepuleai Ameperosa Roma o le itula e 12 i le aoauli (taimi Samoa) i le aso a taeao o le tuu mai ai loa le iuga o le talosaga apili poo le Stay of Execution.
O lea talosaga apili o le taofia lē tumau lea o le faaiuga a le faamasinoga na tuuina mai i le Aso Gafua 17 o Me 2021 e faaleaogaina ai le nofoa faaopoopo.
E savali i le 2 itula na faia ai faafinauga a vaega e lua. O le vaega tagi lea o loo tulai mai ai le afioga ia Fuimaono Sefo Ainuu mo le Ofisa o Faigapalota ma le alii loia o loo tulai mo Aliimalemanu Momoemausu Moti Alofa Tuuau le afioga ia Aumua Ming Leung Wai.
O le itu tali na tulai atu ai tamaitai loia ia Mauga Precious Chang ma Muriel Lui
Taua mai i ripoti le mataina o finauga a vaega uma e lua ma na faafetaia ai foi e le Faamasino Sili loia o vaega e lua i le mae’ae’a lelei o latou folasaga ma finauga na tuuina atu i luma o le faamasinoga maualuga.
