O loo maualuga pea le tulaga ma’ale’ale o aafiaga o le soifua maloloina o o tatou tagata i Samoa mai le gasegase o fatuga’o e pei ona faamauina e le Faalapotopotoga o le Soifua Maloloina o le Lalolagi.
O se tasi lea o lu’itau o loo feagai ma le Faalapotopotoga Faavae o Fatuga’o a Samoa na faavaeina i le tausaga e 2005 lea ua atoa i le tausaga nei le 20 tausaga.
O le ofoina o togafitiga i le faamama o le toto ona ua faaletonu fatuga’o ma le tuuina atu o fautuaga ma polokalame faalauiloa o se tasi lea o galuega faifai pea o loo taulogologo ai lo tatou atunuu i le tāua o le vaai o se fomai mo le siakiina o ia totoga tāua o le tagata soifua.
O le Aso Tofi o lenei vaiaso ua pa’ū tonu iai le aso faavaomalo e faataua ai fatuga’o ma ua lagolagoina e le Sosaiete o le Gasegase o le Kanesa i Samoa.
Ua faaalia i se faalauiloa o lenei aso taua le maualuga o le tulaga aafia o tagata i Samoa i le gasegase o le kanesa o fatuga’o ona o faamai le pipisi e pei o le suka, toto maualuga ma le tino puta.
O lea totoga o le tagata e tāua tele aua na te aveesea le vai le aoga mai le tino ma le tele o isi galuega tāua e tatau ai ona matua puipuia lelei.
Ua faailoa i faamaumauga e 625 gasegase ua togafitia i le falemai faamamā toto talu ona faavaeina le Faalapotopotoga Faavae o Fatuga’o a Samoa, ma o ia foi faamaumauga o loo faailoa ai e tusa ma le 35 gasegase tau fatuga’o i le tausaga ilo tatou atunuu.
E pei ona silafia o le tasi lea o auaunaga a le Matagaluega o le Soifua Maloloina o loo ave iai fesoasoani e ese mai le malo, e pei foi ona foai e le aufaipese o le Punialavaa se seleni na faatau ai nofoa e sefulu e faaaoga i le togafitia o fatuga’o.
O le taumafa i meaai paleni, ma ia inu i le vaiauli ose tasi o fautuaga faalesoifua maloloina mo le tausia lelei o fatuga’o. O le isi fautuaga ia vaai se fomai mo se siaki.
