Ua iai itumalo faapalota ua mautu ma mae’a galuega o ofisa tutotonu e tapuvae tasi iai galuega uma o le atina’e o le tasi le miliona tala.
Peitai ua molimauina le gasolo atu nei o sui o komiti o le atiina a’e e talosaga ni pemita o latou ofisa tutotonu, ina ua ave iai le fautuaga a le Matagaluega Tetele ma Fela’ua’iga e tatau ona faamalieina uma aiaiga o le saogalemu o ofisa tutotonu i le tulafono o le fausia o fale o loo i le vaaiga a le vaega o le PUMA o se tasi o auaunaga a lea matagaluega a le Malo.
Faaalia e le Minisita o Galuega Tetele le tofa Olo Afoa Fiti Vaai, atonu o se sasi i tapenaga a le komiti filifilia a le Malo o loo feagai ma lea polokalame o le atiina a’e e tasi le miliona, le logoina o komiti i le tatau ona iai se pemita e faamautu ai le lelei ma le saogalemu o fale ua avea ma ofisa tutotonu.
