Sa iai lipoti o se aoga i le itu i Matu i Sisifo o Aukilani na faatonuina le tapunia ananafi e le matagaluega o aoga. O le Huapai District school e lata i Kumeu sa lipotia mai ai lea mataupu i le aso ananafi e le Televise tasi.
O se faaaliga i luga o le latou facebook page o loo ta’ua ai e taofi le toe agai atu i le aoga poo le vili atu o le telefoni ona o le a le tali ane se isi ona o le ave o le faamuamua i le aogalemu o le fanau.
Fai mai o loo aofia ai ma le fesootai atu i le fanau e ala i le imeli ma telefoni ma ua faailoa ai foi o nisi faamatalaga o le a saunia mai lava i luga o le app a le aoga faapea foi ma le upega tafailagi a le aoga pe afai ae mae’a le lockdown o loo faia.
O nisi faamatalaga i luga o le upega tafailagi a le aoga sa ta’ua ai o loo manuia ma saogalemu uma faiaoga ma tamaiti aoga ma ua fautuaina i latou e leoleo ina ia loka pea le aoga mo le taimi nei.
E iai molimau sa ta’ua i le lipoti sa o latou faamatala le faataamilomilo o se vaalele helicopter a leoleo i luga tonu o le aoga ma sa faatalia se lipoti mai leoleo e tusa o lenei mataupu.
