E to’a 53 tagata na talosaga e fia tautua i tofiga faamasino o le Faamasinoga o Fanua ma S uafa, ua sauni i le su’ega e sa’ili ai i latou e tauaveina ia tofi faamasino o se tasi o faamasinoga sili ona tāua a le atunuu, e pei ona su’esu’e ai mataupu i fanua faaleaganuu ma suafa matai o nuu ma aiga.

Ua faailoa mai e le Ofisa Sili o le matagaluega o faamasinoga ma le faafoeina o mataupu tau faamasinoga, le Susuga Papalii John Taimalelagi Afele, e 73 talosaga na tuuina atu ina ua faasalalau avanoa o faamasino o le Faamasinoga o Fanua ma Suafa, ae 53 o le a faia iai le filifiliga mo ni faamasino se to’aono.

O le isi 20 o talosaga ua lē talia ona e lē ausia agavaa o loo mana’omia e le tulafono mo tagata e tatau ona faia iai le filifiliga mo ni faamasino o le Faamasinoga o Fanua ma Suafa.

Ua fuafua a mae’a le su’ega mo le to’a 53 ua filifilia, ona faatino lea o le isi laasaga o faatalanoaga poo interview.

O faatalanoaga ia o le a faamautū ai le faai’uga mulimuli e faia e le komisi o galuega a le faamasinoga.

O le komisi foi lea o le a faia le faai’uga i le faatumu uma o avanoa e ono o faamasino, pe leai.

E pei ona silafia e lei mamao tele atu na pasia ai e le Palemene le siitaga o faamanuiaga tau totogi o faamasino o le Faamasinoga o Fanua ma Suafa.

O se siitaga ua laina tutusa ai totogi o i latou o galulue o faamasino o lea faamasinoga, ma faamasino o loo galulue i le faamasinoga o soligatulafono.

Na pau le eseesega o loo iai, ua na o faamasino o le faamasinoga o soligatulafono o loo maua faamanuiaga o taavale e faaaogā i aso uma.