O le tulaga lelei na faagasolo ai le taamilosaga a le itupa o tamaitai i le lakapi Super Rugby Aupiki e pei ona faatino ai i le tausaga nei, ua faailoa mai ai i lipoti i le asō o le a toe faaopoopo atu iai se isi vaiaso e atoa iai le lima o vaiaso mo le taamilosaga i le tausaga fou 2023. 

O kalapu e pei o le Blues, Chiefs, Hurricanes ma Matatu, sa faataunuu ai le taamilosaga e tolu rounds i le tausaga nei ona o aafiaga o le Koviti-19, lea na manumalo ai le Chiefs Manawa, ma sa matele lava ina faatino taaloga i Taupo. 

Peitai la o le tausaga fou o le a faataunuu ai taaloga i totonu o le lima vaiaso ma o le a mafai ona feoai ‘au i le faiga o taaloga. Ua faalauiloa mai foi ma faiaoga e toafa ua filifilia, o Willie Walker mo le Blues, Blair Baxter o Matatu e pei ona iai i le tausaga nei ma mo le uluai taimi foi ua faailoa mai ai ua filifilia e le Hurricanes Poua le uluai faiaoga tamaitai, Victoria Grant. 

O le aso 25 o Fepuari o le tausaga fou e amata ai le Super Rugby Aupiki ae o le sailiga siamupini ua faatulaga mo le aso 25 o Mati 2023.