Ua lē toe iai ni pakaga fua i taimi o le po faapea faaiuga o vaiaso i le taulaga faatau o Aukilani.

O le suiga lea ua fofola mai e le Auckland Transport lea o le a totogi ai pakaga i le tele o vaega o le taulaga i Aso Sa, aso malolo faapea taimi o le po poo tua atu o le ta o le 6 i le afiafi agai i le 8 i le taeao o le aso e sosoo ai.

O le $2 i le $3 i le itula le tau o le a totogi e paka ai le taavale, ma o le aloaia o lenei suiga fou o lona uiga o le a lē toe iai se paka fua e pei ona iai i le taimi nei.

O se suiga o loo teena e le Pulenuu o Wayne Brown lona silafiaina, e pei ona molimau ai i tala a le Herald faatoa ia iloaina ina ua maua atu le tusi i le aso 2 o Me ma ua toe oso ai ma le fiva o le Pulenuu ma fai mai, e lē o faalogo lava le Auckland Transport.

E ui i le lē fiafia o le Pulenuu ae o lea ua uma ona alu i tua tusi a le Auckland Transport i le aufaipisinisi faapea le toatele o tagata e nonofo i le taulaga i le tau fou ua vaavaai e totogi mo pakaga o taavale, ma ua toe lagona ai le lē fiafia o le toatele.

O lenei suiga e amata aloaia mai le aso 1 o Iulai o le tausaga nei.

Puna o Faamatalaga: Auckland CBD parking charges: Motorists to pay for on-street parking 24 hours a day, on weekends and public holidays – NZ Herald