E lei taliaina e Dave Rennie le ofo a le Blues na fai atu iai e avea ai ma faiaoga i le kalapu mo le Super Rugby Pacific o le tausaga fou.
O loo feta’ua’ina i lipoti o le a ono agai atu Rennie i le kalapu a Kobe i Iapani lea o loo iai foi lē sa avea ma faatonu o le Black Ferns, Wayne Smith o se mentor.
Sa galulue faatasi foi Smith ma Rennie i le Chiefs i se taimi ua tuanai lea na manumalo sosoo ai foi i le taamilosaga.
O le kalapu foi lea a Kobe o loo ta’ua i le lipoti o le a agai atu foi iai lē sa avea ma loka a le All Blacks mo tausaga e tele, Brodie Retallick i le tausaga fou.
O Dave Rennie sa suitulaga atu iai Eddie Jones, o le faiaoga mo le ‘au a le Wallabies ia Ianuari ma o loo lipotia e tele ‘au o loo mananao ia Rennie.
O le faiaoga o le Blues sa iai Leon MacDonald ua lipotia o le a agai atu e galulue faatasi ma Scott Robertson i le ‘au a le atunuu le All Blacks.
