O le faai’uga o le palota tauvalaau na faia i le lagolagoina poo le teena o le lafo na faatū mai e le ta’ita’i o le Itu Agai, susuga ia Tuilaepa Lupesoliai Sailele Malielegaoi, na taunuu ai i le teena o le lafo.
O le faai’uga e to’a 15 faipule na lagolagoina le lafo, ae to’a 34 faipule na teena.
E to’atasi le sui faipule o le Itu Agai e le’i faia sana palota, o le tofa Maulolo Tavita Amosa; e to’alua isi sui faipule o le vaega a le HRPP e le’i auai i le fono o le asō, le afioga ia Lautafi Fio Selafi Purcell ma le afioga Salā Pinati.
E to’atasi le sui o le vaega a le FAST e le’i usufono, o le alii minisita, afioga Seuula Ioane.
Na tutū faatasi uma le vaega faaupufai a le FAST e aofia ai sui e to’a 20 o loo tumau pea i le vaega i le ta’ita’iga a le Susuga i le Laaulialemalietoa Leuatea Fosi Schmidt, faatasi ai ma le to’a sefululima o loo iai i le Kapeneta faatasi ai ma le afioga i le tamaitai Palemia, Afioga Fiame Naomi Mataafa, e teena le lafo.
O se taimi mulimuli ane o le a auina atu ai se atoaga o lenei mataupu.
