Faitau selau ta’otoga o gasegase sa fuafua i le asō i Niu Sa Uelese ua faalēaogāina uma ona o le solo tetee e 24 itula a tausi soifua ma faatosaga.
Ua faaauau ia solo tetee ina ua lē taliaina e le Malo le talosaga a le Iuni o loo tula’i mo tausi soifua ma faatosaga mo se siitaga e 15 pasene i o latou totogi.
O le NSW Nurses and Midwives Association ua o latou ta’ua e le’i iai lava se suiga o le tali a le malo ia latou talosaga ae o lea ua vaaia le siitaga ua tuuina i leoleo.
Ua lipotia i le 9News se faamatalaga mai le minisita o le soifua mālōlōina Ryan Park e faapea, ua lē fiafia lava i le solo tetee ua faia nei ma ua faia ai le faai’uga e toe tolopo ta’otoga sa fuafua i le asō ma ua galulue le ‘aufaigaluega e toe faatulaga aso e toe faaauau ai ia ta’otoga.
O le tasi i le aoauli o le asō e savalia ai e sui o le asosi lea a tausi soifua ma faatosaga le ofisa o le Palemene i Sini e faailoa iai le latou tetee.
Puna o Faamatalaga: https://www.9news.com.au/national/nsw-nurses-strike-forces-surgeries-to-be-postponed/b8a6814c-2bda-471a-9661-26d1adf4aacd
