Ua lē taunuu le fuafuaga e masani ai le faleoloa o Myers i tausaga uma i le faaaliga o a latou oloa auā le aga’i atu i faatauga o le Kirisimasi ona o popolega i solo tetee o loo fuafua i le faaitu o Melepone i le Aso Sa nei.
Fai mai lipoti o i latou e lagolagoina Palesitina ua faatulaga foi sa latou tetee e faalavelave ai i le fuafuaga lea a le kamupani fai mai le latou mau e manana’o Myers e faasoa mai le olioli o le KIrisimasi ae leai se olioli e maua i le to’atele o tagata ua fasiotia.
Ua faailoa foi i faamatalaga a i latou ia i le social media ua leai se Kirisimasi ua faalēaogāina ma o le a leai se olioli a o fasiotia tamaiti i Gaza.
I se pepa o faamatalaga mai le Myers ua lipotia i le 9News ua ta’ua ai e moni ua lē oo le fuafuaga lea i le Aso Sa ona o le tulaga ua alia’e mai aemaise o le puipuia o le ‘aufaatau ma le ‘aufaigaluega foi.
Ua faailoa foi e leoleo i Vitoria ua o latou iloa le tetee lea o loo ta’ua ma ua faafia ona lapata’ia ina ia taofia le faatinoina o lea tulaga peitai e lē o usita’ia leoleo.
Ua faailoa i isi lipoti le lē fiafia o le to’atele i le faai’uga ua faia e Myers aemaise fai mai ua 70 tausaga o faia pea lea masani a le faleoloa ae o lea e foliga ua faafefe e le ‘ausolotetee ia ma a latou faamata’u.
Puna o Faamatalaga: https://www.9news.com.au/national/myer-christmas-display-unveiling-cancelled-over-protest-plans/a64082f6-747c-4a0e-b276-359d386c4c78
