Ua faaauau pea ona nofo taofia i Samoa le tamaitai o se tagatanuu Filipaina, o loo molia i lona umia o le pauta faasāina o le ‘aisa ma ni ututau o se laau malosi.

Sa talosaga i le faamasinoga le tamaitai o Arianne Fae Torres Timblique e fia tuua Samoa ae malaga i Amerika Samoa o loo faamautu ai ma lona toalua, ona e lē mafai ona saofia nisi o ana fuafuaga a o nofo i Samoa e faatalitali ai lona faamasinoga ua faatulaga mo le masina o Tesema o le tausaga nei.

Sa ofo foi le tamaitai e na te mafai ona totogi ni faamaonia se lua e ta’i lima afe tālā e faamautū ai lona toe foi mai i Samoa e tali ona moliaga.

Peitai sa tetee malosi iai loia a leoleo ona o popolega e tuuavanoa loa iai e alu ese ma le atunuu, o le itu mautinoa e lē toe foi mai.

Ua talia e le faamasinoga le tetee a leoleo ma ua nofo ai pea i lo tatou atunuu lea tamaitai.

O faamaumauga a leoleo o loo faailoa ai, o le aso 5 o Iulai o le tausaga nei na taunuu mai ai i Samoa Arianne ma faamautu ai i Apia ma faatali ai le aso e toe pu’e ai le isi ana vaalele e malaga ai i Fiti ma alu ai i Filipaina.

Peitai o le aso 6 o Iulai i le vaveao na sauni e malaga ese ai, ae maua ai loa pauta o le ‘aisa ma ututau i lana ato ta’ita’i i le taimi na su’eina ai i masini a le vaega o le puipuiga i le malaevaalele i Faleolo.

O le faamatalaga a le tamaitai sa tuuina atu i leoleo e leai ni ‘aisa sa ia tauaveina, ae o lana tuua’iga o se tagata na ia fafao pauta faasāina i lana ato.

E faato’ā su’esu’e auiliili lea tuua’iga i le taimi e tula’i ai lea tamaitai Filipino mo le su’esu’eina e le faamasinoga o moliaga a leoleo.