E lei lelei le auaunaga a le malaevaalele a Aukilani mo pasese o loo ui mai iinei e faamoemoe e toe tuua Niu Sila mo isi atunuu.
O lagona nei na oo i le pasese na taunuu mai Samoa i le vaveao o le Aso Sa faatoa mavae atu, ae o lea na transit mai iinei e faamoemoe e toe faaauau faigamalaga i Ausetalia.
I ripoti a le Herald o loo molimau ai Elizabeth Nanai i lagona tiga ma le faateia o le silia ma le toaselau e lei mafai ona o i totonu o le nofoaga o loo toe faaee ai faigamalaga mo Ausetalia, ma o lea na tofafa ai lava i le auala ma faatali mo le tolu itula.
Ta’ua mai ai foi o le toatele o pasese na omai i lea faigamalaga o i latou na auai atu i le fono faaletausaga a le Ekalesia Faapotopotoga Kerisiano Samoa.
E oo lava foi i le taumafai atu o le pasese e faafesootai le pulega o le malaevaalele, le kamupani vaalele a le Ea Niu Sila faapea le Aviation Security, e lei manuia uma.
Ae i se tala mai le malaevaalele a Aukilani o loo ta’ua ai o pasese nei e transit mai iinei e moomia le faia o siaki e le AVSEC poo le Aviation Security ma o lea auaunaga e taunuu le malaga ua malolo, o lea na tapunia i le 11 i le po.
Mai le Ea Niu Sila o se tala faanoanoa peitai o se mataupu e patino i le malaevaalele ma le AVSEC.
Ua tali mai ai le malaevaalele a Aukilani o loo galulue ma le AVSEC e faaleleia le system lea ua aafia ai o tatou tagata.
