E lē o fiafia pule a’oga i saunoaga a le Palemia, Christopher Luxon faatatau i sanuisi marmite e sau ma le tamaitiiti mai lona aiga pe a lē fiafia i mea’ai o le school lunch programme.
Fai mai Luxon, afai e lē o fiafia mātua i mea’ai o loo maua mai i le polokalame lenei o loo faatupe e le malo, o lona uiga ua tatau ona sau le tamaitiiti ma lana sanuisi marmite mai lona aiga.
Ua molimau nisi o pule a’oga i lipoti a le leitio faavaomalo a Niu Sila, e lē logomalie nei saunoaga ona o lea e to’atele fanau o loo faamoemoe iai i mea’ai nei ma o nisi foi o fanau e lē o faia ni breakfast poo ti o le taeao i aiga o atu ai i a’oga.
O le polokalame lenei e lē o misi ma le faaseā talu mai ona toe sui le faiga i le tausaga nei, ma o le faaseā lata mai o loo iai nei o le liu suāvaia o le plastic i luga o mea’ai.
Ae mai le minisita lagolago o a’oga o ia foi o loo gafa ma le vaaiga o lenei polokalame, David Seymour ua ia faamautinoa o loo faia nei su’esu’ega ma o loo iai le faamoemoega ia faaleleia a o le’i amatalia le kuata lona lua o a’oa’oga o lenei tausaga.
O le mataupu lava foi lenei e tasi na talo ai le fonotaga a le minisita o a’oga, Erica Stanford ma Seymour ananafi peitai e le’i mafai ona faataunuuina.
Puna o Faamatalaga: Education Minister waiting for answers on school lunches scheme
