E manatu le NZ Rugby o finagalo faaalia ina ia faasee ese mai tofiga le Fono Faatonu poo le Board o iai nei o le lakapi o se gaioiga e taaina ese ai le silasila a o faaauau pea ona faia suiga i le faatulagana o le pulega.

Ua lipotia i le televise tasi i le vaiaso nei le tali ane a le asosi o tagata taaalo lakapi a Niu Sila i fuafuaga a le Fono Faatonu i ni suiga ua toe fetuunai i le pulega e ese mai le fuafuaga sa faalauiloa ane i le Pilkington report i le tausaga talu ai.

O le faauluuluga o le asosi o tagata taaalo lakapi o Rob Nichol na ia toe faamanino i lea lipoti latou te lei lagolagoina se fuafuaga a le NZ Rugby poo iuni faaitumalo ua faia e faatatau i ni suiga i le puleaina o le lakapi i Niu Sila.

Na ia ta’ua ai le lē lava o le talitonuina ma le faamoemoega o iai i le pulega o iai nei ma e na te lagolagoina fautuaga e pei ona tuuina ane i le lipoti e pei ona ta’ua ma valaau ai i le Fono Faatonu ua tatau ona faasee ese ma toe talosaga mo o latou avanoa i lalo o le faavaa ua faatulaga mai i le iloiloga sa faia.

O le asō la ua faailoa ai i se pepa o faamatalaga mai le NZ Rugby lo latou lē fiafia i le tulaga e pei ona ta’ua ma ua faailoa i lea lava lipoti o le vaiaso fou ua fuafua ai se fonotaga a le NZR ma le asosi o tagata taalo lakapi faapea iuni faaitumalo ma isi stakeholders e talanoaina ai le mataupu.

Puna o Faamatalaga: https://www.1news.co.nz/2024/04/05/nzr-says-calls-for-board-to-step-down-are-a-distraction/