Ua faailo finagalo lē fiafia o le faigamalo a le Atu Solomona ina ua mae’a faasalalau se polokalame a le ABC o le Four Corners e faatatau i le vave o le faatinoina o gaioiga a Saina ma le faamautuina o ona sootaga ma lea atumotu mai le Pasefika.
O le Pacific Capture Program sa silasila ai i aafiaga o kamupani ua umia e le malo o Saina i totonu o le Atu Solomona ma faailoa ai o se tasi o ia pisinisi o loo faia nei ni fetuuna’iga mo le faatauina o se vaega o le vaomatua i luga o se tasi o motu o le Atu Solomona.
Fai mai lipoti o le polokalame ua faaosofia ai le lē fiafia o le Palemia o le Atu Solomona Manasseh Sogavare ma sui sinia o le malo ona fai mai a latou o nisi nei o taumafaiga a le aufaasalalau a Ausetalia e ta’ufaatauvaaina ai le faigamalo ma faaleagaina ai sootaga i le va o Honiara ma Beijing.
Ua lipotia e le ABC ua valaau ai nei le malo o le Atu Solomona i le hai komesina o Ausetalia i lo latou atunuu, Lachlan Strahan ina ia faatalanoa ai lea tulaga.
E lē o ta’ua se tali a le hai komesina i lea tulaga ae ua faailoa foi i le lipoti o loo iai lava le tulaga tuto’atasi o le ABC mo ana lipoti o lona uiga e lē mafai foi e sui sinia ma minisita o le Feterale ona puleaina mea o loo faasalalauina e le ofisa faasalalau.
