A o tapena sui mamalu o itumalo o loo seei i tofi faipule o le paeaiga lona 17 a le Palemene i lana ulua’i fono o le tausaga fou e pei ona faatulaga mo le Aso Lua o le vaiaso fou le aso 21 o Ianuari, ua laumanu’ia i nisi o lipoti i lenei vaiaso, le ono iai o se tapenaga a le tamaitai Palemia e feiloa’i atu ai i le ta’ita’i o le Itu Agai, i le fuafuaga e soalaupule le va o le fogāvaa ua aafia ai le lotoifale o le vaega faaupufai o le Faatuatua i le Atua Samoa ua Tasi o loo tu i le foe o le pulea o le malo.
Ua faailoa e le Palemia le afioga Fiame Dr Naomi Mataafa i le feiloa’iga ma tusitala o loo iai le avanoa e feiloa’i ai i le susuga Tuilaepa L Sailele Malielegaoi, ae ua faailoa foi e le ta’ita’i o le Itu Agai i tusitala na afea lona ofisa mo sona finagalo, e iai foi le avanoa la te feiloa’i ai ma le Palemia faapea foi ona fia feiloa’i i le ta’ita’ifono o lea vaega faaupufai le susuga Laauli Leuatea Polataivao Fosi Schmidt.
Ua faailoa e le tamaitai Palemia i lana saunoaga faalaua’itele i le vaiaso nei, o le faatuatuaina ma le lē faatuatuaina o lana ta’ita’iga faapalemia e filifili e le Palemene o Samoa, ae lē o le vaega faaupufai.
Ua ia faailoa foi e iai aiaiga faalefaavae ma ala o mea o lena laasaga, ma ua nofo sauni iai e faatino i luma o le Fono Aoao Faitulafono poo le Palemene a le atunuu.
O lea finagalo o le ta’ita’i o le malo ua tali ai i se tapenaga a se vaega o faipule o le faafaletui o lana vaega faaupufai, lea ua laumanu’ia ai le faatū o se lafo o le lē faatuatuaina i totonu o le fono usu a Samoa e faamuta ai le tofi Palemia o le sui Faipule o le itumalo faapalota o Lotofaga.
