A o faagasolo pea galuega a le faalapotopotoga o le malosi tau eletise e foia faaletonu sa motusia ai lea auaunaga i le motu atoa o Upolu, o lea ua faailoa mai e le faalapotopotoga i le afiafi o le Aso Lulu o le vaiaso nei, e tatau ona mae’a le tosoina o uaea eletise malolosi i le vaiaso nei.
O le fausiaina o le laina eletise mai Siusega i Fuluasou e ui atu i le malaetaalo i Tuanaimato ua mae’a le vaega tele o lea laina o loo toso i luga o pou lea o loo ui atu i le alatele i Siusega aga’i atu i le malaetapolo i Tuanaimato.
O loo faaauau ai le faamamāina ma aveese laau o loo aafia ai le laina malosi.
Sa loulouā le tau i le amataga o lenei vaiaso ma faamuamua ai le saogalemu o le aufaigaluega e pei ona faailoa e le faalapotopotoga ae o le toe lelei mai o le tau ua faaauau ai ma le fuafuaga e tatau ona mae’a i le vaiaso nei.
Ua ave ai le faafetai a le pulega o le malosi tau eletise i le atunuu i le onosa’i ma le lagolago ia latou taumafaiga ina ia faamautū lana tautua mo tagata uma.
