O le fautuaga mai se lipoti i ni su’esu’ega na faia i le tulaga o le malosi ma le saogalemu o falematamata i le malaetaalo o le Apia Park, ua talia ai e le Kapeneta le fautuaga e tala uma i lalo falematamata ona ua i se tulaga lamatia le saogalemu mo le faaaogāina e tagata.
Ua faailoa i se faai’uga a le Kapeneta o le talaina i lalo o falematamata e tolu o loo i le itu i Sisifo o le malaetaalo i le Apia Park o le a faatino ai ma galuega o le toe fausia o se isi nofoaga fou e sili ona malosi ma saogalemu mo le faaaogāina e le atunuu.
O se vaega o inisinia mo galuega tau fale mai Saina o loo feagai ma galuega faaleleia o ia fale ma le malaetaalo o loo i Samoa i le taimi nei, o latou ia na faia le fautuaga i le Kapeneta e tusa o le lē toe saogalemu o falematamata.
O taaloga a le Pasefika sa talimalo ai Samoa i le tausaga e 2019 sa galulue ai inisinia faufale mai Saina mo le toe faaleleia o ia fale matamata ma le malae faataamilo mo taaloga afeleti.
O le Matāgaluega o Taaloga ma Alaga’oa mo le Fiafia o Tagata o loo gafa nei ma tapenaga mo le toe fausia o lea nofoaga, ae o le Aso Tofi o le vaiaso nei o le a faatino ai se sauniga e amata aloa’ia ai galuega mo le faaleleia atoa o vai o le taaloga aau i le faleaau i Tuanaimato le nofoaga o loo iai lea matāgaluega fou a le malo.
O inisinia ma tagata mai Saina o le a latou faatino lea galuega.
