O le feiloa’iga a tusitala ma le ta’ita’i o le Faatuatua i le Atua Samoa ua Tasi i le vaiaso na te’a nei na faailoa ai e le susuga Laauli Leuatea Polataivao Fosi Schmidt, o le fofō i le lē mautonu o le vaega faaupufai o le faamavae o le tamaitai Palemia, ona ua lē o toe iai se faatuatuaga o sui faipule o le faafaletui o le vaega faaupufai aemaise ua faamuta le toe avea ma sui auai o le pati faatasi ai ma isi minisita e to’alima.
O le feiloa’iga a tusitala ma le ta’ita’i o le Itu Agai i le Aso Lulu o le vaiaso nei na faailoa ai e le susuga Tuilaepa L Sailele Malielegaoi lona lagolagoina o lea finagalo o le ta’ita’i o le Faatuatua i le Atua Samoa ua Tasi.
Faaalia e Tuilaepa a vavae ese le to’aiva o minisita o le Kapeneta o loo i totonu pea o lea vaega faaupufai, ona totoe ai lea na o le to’aono lea ua aveese ma le latou pati faaupufai.
O lona uiga ua leai se numela e lagolagoina le Palemia o loo faauluulu ai le Pulega Faatonu lea o loo tauaveina nei galuega o le faagaioia o le malo.
Ua faailoa e le ta’ita’i o le Itu Agai sa feiloa’i a latou loia ma sui o le komiti a lana vaega faaupufai mo le faamae’aina o tapenaga o le latou talosaga o le a faaulu i le faamasinoga e aumai ai se ta’otoga tonu o le tulaga ua iai nei le faigamalo a le Faatuatua i le Atua Samoa ua Tasi.
