Ua ave le lagolago atoatoa a Samoa i le feagaiga mo le siitia i se tulaga maualuga ma lelei o auaunaga tau vaalele savili, ina ua avea le Minisita lagolago o Galuega Tetele ma Fela’ua’iga e aofia ai mataupu tau vaalele savili, le afioga Niuava Eti Malolo, ma sui o le tatou malo e auai i le fono faaminisita a atunuu Asia ma le Pasefika i mataupu tau vaalele savili, sa usuia i le aai o New Delhi o le laumua o le atunuu o Initia.
O lea feagaiga ua sainia e Samoa o le a galulue faatasi ai lo tatou malo ma isi malo e faamautū tapenaga uma mo le lelei o lea tautua i totonu o atunuu aemaise lava i taimi e feagai ai ma ni tulaga faigata e pei o faama’i pipisi.
O le tausaga e 2018 i le fono sa usuia i le atunuu o Saina na ulua’i osia ai se feagaiga i lea auaunaga.
Sa saunoa le minisita lagolago le afioga Niuava Eti Malolo i le fonotaga i Initia ma ia faafetaia ai atunuu sa lagolago malosi ia Samoa i le taimi o le pipisi o le faama’i misela, ma le faama’i Koviti-19.
