Ua lagolago e le tamaitai loia sinia le afioga Maiava Visekota Peteru le suesuega a le komiti o faaseā a le sosaiete a loia i Samoa, ae ua lē faaalia sona finagalo i le suesuega. I se faamatalaga tusitusia mai le tamaitai loia e faitauina faapenei, 

“E tusa ma ni faitioga ua tauaaoina e le Sosaiete a Loia e afua mai i le faai’uga o le faamasinoga maualuga i le “civil contempt”, ua uma ona faailoa aloa’ia e la’u loia o lea ua ou nofo sauni e tali faaaloalo atu iai. I lenei taimi, e noatia lo’u tagata mai le tuuina atu o se isi faamatalaga i lenei mataupu, ina ne’i lamatia ai se suesuega ua tapena iai le Sosaiete a Loia,”… Maiava Visekota Peteru. 

O le Aso Faraile o le vaiaso nei ua faaalia e se molimau faatuatuaina, o le a fono ai le sosaiete a loia e faatalanoa ai le tulaga ua oo iai suesuega, e le gata o le mataupu i lea sui o le sosaiete, ae o isi faaseā e silia i le 40 mai nisi tagata, e faasaga i isi loia o sui o le sosaiete.