Ua ioeina e le Kiwibank moliaga e 21 ua faia e faatatau i lo latou solia o le Tulafono o Fefaataua’iga Talafeagai, le Fair Trading Act.

O le masina na te’a nei na folafola ai e le Commerce Commission ia moliaga faasaga i le faletupe ona o ni mea sese sa faatino ua ova ai ni totogi sa totogiina ane iai e le silia ma le 36 afe o ana paaga.

Fai mai le One News na lipotia lava e le Kiwibank latou i le Komisi ma faatoese foi i ana paaga ma amata ai le toe faatulagaina o le faafoi o tupe a tagata poo refunds.

O totogi e faatatau i fees ma interest rates i nonogatupe o fale, home loans, credit cards ma overdrafts talu mai le 2019.

Fai mai le komisi na iai lava faaletonu talu ona amata mai le Kiwibank i le 2002.

Ua faailoa se finagalo o le Ofisa Sili o le faletupe o Steve Jurkovich i le lipoti lea e faapea na iloa e le faletupe le faaletonu ma gaioi loa e galule faatasi ma le komisi i le latou suesuega ma e ui la i le lē fiafia i le faaletonu ua alia’e mai peitai e matuai mitamita i le tulai mai a lana aufaigaluega e tutū faatasi e togafiti le faafitauli ma toe faasa’o mea uma mo ana paaga.

Ua ta’ua o le faai’uga o le faasalaga mo le mataupu lea o loo faatali i le Faamasinoga Faaitumalo i Aukilani.

Puna o Faamatalaga: https://www.1news.co.nz/2024/07/16/kiwibank-pleads-guilty-to-fair-trading-act-breache