Ua lagolagoina e le taitai o le Itu agai le susuga Tuilaepa L Sailele Malielegaoi, le faaiuga a le kapeneta ua aveesea uma ai aiaiga o puipuiga o le atunuu mai le faamai koviti 19, mo pasese uma e malaga mai fafo.

Ua faaalia e Tuilaepa i auala o faasalalauga televavave mai le ofisa tutotonu o le pati faaupufai e puipuia aia tatau a tagata, sa tatau ile Malo ona aveesea uma ia aiaiga ile aso muamua o Aokuso na toe tatala ai tuaoi o Samoa mo faigamalaga mai atunuu mamao.

I le saunoaga faalauaitele a le sui Palemia na faailoa ai lea faaiuga, na faaalia e le afioga Tuala Tevaga Iosefo Ponifasio, o le fautuaga a le matagaluega o le soifua maloloina, na faavae ai le faaiuga a le kapeneta ina ua faamautu le siitia pea o pasene o tagata ilo tatou atunuu ua maea o latou tui puipui e lua o le faama’i. O le maea o le fono a le kapeneta ile aso Lulu o le vaiaso nei, o le aso Tofi na faailoalautele ai e le afioga ile sui Palemia le faaiuga.

Le afioga Tuala Tevaga Iosefo Ponifasio, o le sui Palemia.