Ua faatali nei le alii o Rupeni Lupu o se tagatānuu o Fiti i se faasalaga a le faamasinoga maualuga i Samoa, i moliaga e lua ua ia ioeina o lona umia ma le faaulufale i lo tatou atunuu o le nakoti o le aisa.
O le amataga o lenei vaiaso na tula’i ai lea alii Fiti i le faamasinoga ma tuuina atu ai e lana loia lana tali ioe i moliaga e mafua mai i le galuega a le ofisa o le tiute i le malaevaalele i Faleolo na maua ai Rupeni o ia umia lea pauta faasāina ina ua taunuu mai Amerika Samoa i le faamoemoe e mālōlō i Faleolo e faatali ai lana vaalele e malaga ese ma lo tatou atunuu.
O le masina na te’a nei o Mati na maua ai lea tagata malaga i le nofoaga fou i le malaevaalele i Faleolo ua faaee ma faatali ai pasese e malaga i le va o Apia ma Pago Pago le Faleolo Regional Airport.
O loo tatala lea taule’ale’a i tua i ni aiaiga e faatali ai le faai’uga o le masina lenei o Aperila e lau ai sona faasalaga.
