Ua faamaonia mai nei le ioe ai o le faipule filifilia mo Sagaga No.1 Loau Solamalemalo Keneti Sio o le sui foi o le HRPP e faamavae mai lona tofi faipule ae toe foi e fai le faigapalota laititi mo le itumalo. Peitai o le sui na faia le tagi le susuga Papalii Tavita Moala o le sui o le FAST o le a le toe alu i le faigapalota laititi.
Taua e Loau i fafo o le potu faamasino “ua lagona le vaivai o le loto ma out e le’o iloa pe aisea na manao ai e faamavae ae le’o toe alu i le faigapalota sa sili ai ona tuu a’u oute alu ae o lona uiga e iaia se isi tamalii o loo fuafua papalii e tamoe i le faigapalota laititi”.
Na taua foi e Loau e fua lava i le musumusuga a le Atua ma se finagalo o le itumalo pe ono toe alu i le faigapalota laititi pe leai.
O Loau na manumalo mai i le iuga o le faigapalota a le atunuu na faia i le Aso 9 o Aperila 2021 i palota e 965 ae tulai mai palota a Papalii i le to’a 668.
