I le masina o Oketopa o le tausaga e 2023 na lavea ai i se vaega o le alatele i Malifa le pasi o le Laumosooi sa aveina e Togamataimoana Vaea ma maliliu ai ni tamā matutua se to’alua ae manunu’a le pasese e 33, o moliaga e 39 a leoleo sa teena malosi e Togamataimoana.
O le Aso Lua o le vaiaso nei na tula’i ai o ia mo le valaauina o molimau e 53 a leoleo e lagolago ai moliaga, peitai e iai le vaega o lana faamatalaga na faia i leoleo sa ia teena i lana finauga e leai ni ana tala faapea na tuuina atu i leoleo.
Na valaau e le loia a leoleo molimau e to’alua o le leoleo na faia le faamatalaga ma le leoleo na molimau a o faia le faamatalaga a lē ua molia.
O le mae’a ona su’esu’e o ia molimau ma le molimau a Togamataimoana na taunuu ai le faamasinoga i le talia o le faamatalaga tusitusia a lē ua molia na tuuina atu i leoleo.
O le taunuu o le finauga i lea faai’uga na tula’i ai le loia a lē ua tuua’ia ma sui le tali a Togamataimoana Vaea mai le tetee i lona ioe i moliaga e lua o le fasioti tagata pa’ivalea ona o se faalavelave tau taavale ua fano ai le soifua o ni tagata se to’alua, o le moliaga o lona faafoeina o se taavale e lei laiseneina faaletulafono, ma le moliaga o le avetaavale faatamala na mafua ai ona manunu’a le pasese e 33 sa malaga ai i le pasi.
O se malaga i le taimi o le taeao sa aga’i mai ai i Apia e ui mai i le auala i Tiavi ma aga’i mai ai i le taulaga i Apia ae e le’i taunuu le faigamalaga ina ua oso le pasi i tua i se vaega o le auala i Malifa.
O taofi o le pasi sa faaletonu e pei ona lipotia ai e leoleo o le mafua’aga lea o le faalavelave.
O le ioeina e lē ua molia o moliaga a leoleo ua faatulaga ai o le aso 11 o le masina fou o Mati e tula’i ai mo se lipoti a le ofisa faanofo vaavaaia, i lipoti i aafiaga o tagata na manunu’a i le faalavelave, ma folasaga a loia.
