O feteena’iga sa tulai mai i nisi o aiga o le nuu o Levi Saleimoa ona o le fuaina o tuaoi o fanua o le nuu o Afega i le masina amata o le tausaga nei, na mafua ai ona molia e leoleo se taulealea o le nuu o Levi i ni solitulafono e pei o le tau’ai maa, umia o se aupega matautia, ma le faaleagaina o se meatotino o le taavale lea a le faipule o Sagaga 2 le tofa Maulolo Tavita Amosa ae o se matai o le nuu o Afega.

O faamaumauga a leoleo na tuuina atu i le faamasinoga e faatatau i solitulafono o loo faailoa ai sa ioe lē ua molia i moliaga e 4, o ia lea o James Lolesio poo Kiemi Lolesio 18 tausaga le matua.

Sa faamatala e James i leoleo o ia sa pu’e lana video o le gaioiga sa faia i lo latou fanua, ae tau atu ai lē na tagi o faia lana gaioiga lea ma valaau atu ai e taofi.

Sa faailoa foi e lē ua molia i leoleo na ita ina ua lafo atu ni tala taufaamata’u a le faipule, lea sa valaau atu ai na te fanaina o ia.

O lona ita na mafua ai ona tago i le maa ma togi ai le taavale lea o loo faaalia e leoleo e tusa ma le $4,700 tala le tau o le vaega na faaleagaina.

O moliaga uma e fā sa molia ai James poo Kiemi Lolesio o le faasalaga o le falepuipui, peitai ua silasila le faamasinoga o le faato’ā molia lea i se solitulafono, ma sa lei faafiti James ae sa ioe i moliaga uma a leoleo.

O le lafoina foi o ni tala taufaamata’u e lē na tagi i lē ua molia sa amanaia ma faaaogā e le faamasinoga i le iloiloga o lana faai’uga i le faasalaga.

O le faasalaga ua taunuu iai le afioga i le faamasino o le Faamasinoga Maualuga ia Fepuleai Ameperosa Roma, ua faamaonia moliaga e leai se faasalaga faafalepuipui, ae nofo vaavaaia mo le 12 masina ma galue fua mo le lelei o isi tagata mo le 80 itula.