Ua galulue faatasi matagaluega a le malo faapea ai ma pisinisi e fesoasoani i tagata faigaluega lea na faasese i visa faigaluega o le Accredited Employer work visa.
O le aso ananafi na faafesagai ai alii Initia mai Bangladesh faapea le aufaipisinisi i Saute o Aukilani e faatalanoa avanoa faigaluega ma o se aso na tapena uma e le matagaluega o le Social Development, sa faia ai i Magele.
E molimau ai nisi o alii i tala a le leitio a Niu Sila, o se fiafiaga tele le laasaga ua oo iai le amata ataata mai o le maua o se galuega auā o lea lava ua alu le 4 masina ma uma atu ai ma le faamoemoe e ono maua se galuega i totonu o Niu Sila auā lona aiga o loo faatali mai.
Mai le Immigration pau le kulupu o loo taulai iai le fesoasoani i le taimi nei o alii e 146 lea na maua o loo faaofiofi i fale i Saute o Aukilani, toe leai ni galuega.
Fai mai ai ma le Immigration o lea o loo faaauau pea suesuega a le pulega ma e oo atu i le toaono falefaigaluega e fesootai ma faiga taufaasese nei ua toe tigaina ai o loo taulai iai.
O le alia’e o lenei mataupu e lē gata ua suesue ai e le Immigration, sailia galuega ma fale e le matagaluega o le Social Development, le loaloa o le komiuniti i fesoasoani tau meaai ae faapea le aufaipisinisi i avanoa faigaluega.
